DUSREM KONKNNI (ROMI LIPI) SAHIT’YA ANI SONVSKRUTI SOMMELON

DUSREM KONKNNI (ROMI LIPI) SAHIT’YA ANI SONVSKRUTI SOMMELON

KITEM GHODDLEM, KITEM ZODDLEM…

JIVIT masikacho sompadpi somiticho vangddi ani sommelonacho sekretar, Walter Menezes mahiti dita.



Dalgado Konknni Akademin (DKA) aplem Dusrem Konknni (Romi Lipi) Sahit’ya ani Sonvskruti Sommelon Fevrerache 20 ani 21ver Kuddchodde xarant umedin ani hurben ghoddun haddlem. Hea sommelonant poilea disa sumar 700 zalear dusrea disa sumar 200 Konknni bhoktamni ani protinidhimni vantto ghetlo. Sommelonachea mukhel darvonttea mukhar ani bhitor mukhel machiyecher Kepemchea Special Effects ani Rebello Decorators hanchea kolakaramni aple kolechem sundor dorxonn ghoddoilem ani sommelonank ek vegllench vatovoronn nirmann kelem. Mukhel darvonttea lagim, brass band ghevn, Abdonio Rodrigues ani tachea sangateamni soglleank songitantlean yevkar dilo.

Frank Fernand Nagar

Kuddchoddechea Ravindra Bhavanant zalolea hea sommelonanchea vosreak Frank Fernand Nagar nanv dilem. Frank Fernand hacho zolm Kuddchoddea ganvant zalo ani Bhoktivont Pri. Agnelo de Souza hanche koddlean tannem bavtism ghetlo. Amchem Noxib, Nirmonn ani Mhoji Ghorkarn’n hea Konknni cholchitrank tannem bosoilolem songit aizui lokanchea vonttar khellta.

Sorgest Albert Carvalho Machi

Kuddchoddechea sorgest Albert Carvalho-n tiatr mollar – zanv tiatr borovn, digdorxit korun ani tantum svota bhag ghevn – khub tankicho ani molacho vavr kela dekhun mukhel machiek Sorgest Albert Carvalho Machi mhunn nanv dilem.

Pustokancho Mandd

DKA-n Pustokancho Mandd hea nanva khala halimchea vorsamni Romi lipiyent uzvaddak ailolea sumar 100 Konknni pustokanchem prodorxonn kelem. Hantunt Diocesan Centre for Biblical Apostolate, Thomas Stephens Konknni Kendr ani Queeny Productions & Publications hannim uzvaddak haddlolea pustokancho aspav aslo. Sommelonanchea donui disam bhitor veg-vegllea borovpeanchea pustokancheo sumar 300 proti khopleo.

Ugtavnne Dobazo

Manache Soire, Kuddchoddecho Amdar, Xri Shyam Saterdekar ani Kepemcho Amdar, Xri Chandrakant (Babu) Kavlekar hanchea hatantlean poromporik divli pettovn sommelonanchi ugtavnni zali. Tache poilim, Kepemchim Kirnnam hea pongddan, Tomazinho Cardozo-n rochlolea ani Elvis Goes-an songit bosoilolea yevkar gitantlean ugtavnne dobajeak survat keli.

Hea vellar aplea uloupantlean manestamni manddlole kaim mhotvache vichar:

Pri Manuel Gomes, Yeukar Odheokx:

“Ami konnacheruch virudh nhoi. Ami khoichech boliecher vo lipiecher add nant. Ami fokt sangunk sodtanv: amkam Romi lipiechem gorv asa, kiteak he lipient zaiteamni adim thavn boroilam, boroytat ani fuddarak-ui boroitole ani he porim amche maim bhaxechi seva kortole.”

Tomazinho Cardozo, Vavurpi Odheokx:

“1987 vorsa Konknni bhas Rajbhas korchi chollvoll zali. He chollvollent-ui soglle Konknniche mogi ekvottan zhuzle ani hem-ui zhuz jikhle. Hi chollvoll choltana Konknni lipi Devnagri vo Romi zaunchi hache vixim ami kednanch uloile nant. Zhogoddle fokt Konknni bhaxek lagon. Punn jednam Bill pas zalem ani Konknni bhas rajbhas zali, tea Bilant ‘Konkani language means Konkani in Devnagri script’ hem ‘definition’ ghalun Romi lipientlean boroupi Konknni somazacho visvasghat kelo.

…Tea khatir lipiancho bhed-bhav kuxin dovorlo zalear Konknni bhas hem ekvottachem vhodd hatiyar zaum yeta.”

Bonaventure D’Pietro, Mukhel Uloupi:

“Amchea desachea itihasant vhodd-vhodd fuddari zaun gele, zannim Devnagri xikonastana ap-aplea prantik bhasamni mullavem xikop korun vhodd fuddari zaun gele. Chodd pois vochum nakat, amcheach Goyant hache purave melltat: Dr. Francis Luis Gomes, ek vhodd des-bhokt, zannem aplem xikxonn Purtugez bhaxentlean kelolem. Hea Goykaran, Purtugez Sonsodent (parliament) firngi loka samkar boddayen Bharotache sonvskrutayecho ul’lekh kelo. To Devnagri xiklolo kai?

Dr. Tristao Braganza da Cunha, taka ami Goyche Suttkecho Bapui mhunnon pachartanv. To Devnagri xiklolo kai?

…Desacho mog ani obhiman aple bhitor roch’che khatir, ani desbhokti dakoll korche khatir, Devnagri lipiechich goroz na. Khoinche-i bhaxentlean xikun mon’xachean des-bhokt zaum yeta.”

Manache Soire

Goychi osmitai ani sonvskrutai samballtoleanv zalear amkam Konknni bhaxechi udorgot korchi poddtoli mhunn Amdar Shyam Saterdekar-an ulo marlo zalear Amdar Chandrakant (Babu) Kavlekar-an tornnatteamni atam Konknnichi gaddi aplea hatamni ghevpacho ani sonvskrutai rakhpak matthem marpacho vell aila mhunn sanglem.

Premanand Lotlikar, DKA-cho Odheokx:

“Ek Bhas, Ek Lipi, Ek Sahit’ya ani Ek Somaz osle vichar gheun cholpi, mandpi ani manddpi, Konknnicho prochar ani Konknnicho ekvott korche bodlek Konknni lokancho duspott ani Konknnichem luskonn kortat hem mat sot. Ami porot ek pavtt sangunk sodtanv: ami veglleponnant ekvott sadunk zai. Ek Bhas ani Anek Lipyo hem sot kitlem-i koddu aslear-ui tem mandun gheunkuch zai.”




Bhouman

Ugtavnne dobajeant zancho bhouman zalo tanchim nanvam oxim asat:

• Mateus Antonio Pereira – (Sonvskruti)
• Anthony Menezes - (Sahit’ya)
• Assumption Martinha Rodrigues e Pereira – (Sonvskruti)
• Abdonio Rodrigues - (Songit)
• Pri. Nixon D’Silva – (Songit)
• Dr. Jayanti Naik – (Lokved)
• Pri. Planton Faria – (Potrkarita)
• Luciano Dias - (Sonvskruti)
• Merlin Rosaria Fernandes – (Tornnatim Borovpi)
• Milton Rodrigues - (Tornnatim Borovpi)
• Venisha Fernandes - (Tornnatim Borovpi)
• Vincy Quadros – (2008 Sommelonancho Vavurpi Odheokx)

Sotram

Dusrea disa, Tornnatim Konknnicho Fuddar hea sokallchea sotrant, Pri. Kyriel D’Souza, V. Ixtt-acho adlo sompadpi, hanchea odheokxponna khala Vincy Quadros (Tornnatim ani Sahit’ya), Mungllurcho Titus Noronha (Tornnatim ani Sonvskruti) ani Pandharinath Lotlikar (Tornnatim ani Somaz) hannim aple ‘paper’ manddle.

Don’parchea jevonna uprant dusrea sotrant, Romi Lipientlean Konknni Sahit’yachi Udorgot hea vixoiyacher bhasabhas zali. Dr. Rafael Fernandes, Goy Vidyapittantlo ‘Associate Professor’, ho hea sotracho odheokx aslo. Pri. Louis Alvares (Firgoz-potram Amchi Girestkai), Anil Kumar (Tiatrachi Borpavoll ani Gitam) ani Dr.(Pri.) Pratap Naik-an (Sod-vavr ani Tachem Mhotv) aple ‘paper’ manddle.

Tharav

Xevottacho dobazo zaunche poilim, sorkara mukhar manddunk, tin tharav ghetle:

• Rajbhas kaideant sudharnni korun, Romi lipiek Devnagri lipiye itloch dorzo diumcho
• Romi lipiyentlean uzvaddak yeupi Konknni pustokank Kala Akademin vegllo Sahit’ya Puroskar dovorcho ani
• Tiatr ani nattkam khatir Ponnje xarant ek adhunik sabha-ghar bandchem.

Xevottacho Dobazo

Xevottachea dobajeant Mukhel Soiro Xri. Paresh Bhende, Kuddchodde-Kakoda Nogorpalikecho Nogor-Odheokx, ani Manacho Soiro mhunn Xri Jess Fernandes, Sahit’ya Akademi Puroskar favo zalolo kovi aslo.




Aplea uloupant, Xri Paresh Bhende-n Rajbhas kaideant Romi lipiyek Devnagri itloch man mellpak zai ani Sahitya Akademiche somiticher Devnagri ani Romi lipiyentle eksarkhe vangddi (equal representation) asunk zai mhunn sanglem.

Pri. Nixon D’ Silva hanchea fuddarponna khala Fr. Agnel’s School of Music & Performing Arts-achea sumar 40 supurlea bhurgeamchi songitachi karyavoll, Comedian Domnic ani Luis Bachchan-ancho comedy show, Prince Jacob-acho tiatr, Zayat Zage, Anil Kumar, Fatima ani her nanvoste kolakaranchi karyavoll ani tech bhaxen Hortencio, Cruz ani Paul Carvalho ani Franco Rodrigues hanchea fuddarponna khala Kuddchoddechea kolakarank ghevn donuim dis git-songit ani nach-nattkuleamcheo veg-veglleo sonvskrutik karyavolli zaleo.

Elliton Fernandes, Preeta Naik, Jose Salvador Fernandes, James Fernandes ani Mathew D’Costa (9422057365) hannim sutr-sonchalon kelem.

[HO LEKH JIVIT, ANK: MARS 2010, HEA MASIKACHER UZVADDAK AILA]


Walter Menezes